Wasiir ku xigeenka Wasaaradda Shaqada & Arrimaha Bulshada oo soo Xiray Seminaar ay ka soo qeyb galeen xubno ka kala socday hey`adaha Shaqaalaha Dalka oo kala ah, Guddiga Arrimaha Bulshada ee Baarlamaanka, Xafiiska Madaxweynaha, Xafiiska Ra’iisul Wasaaraha, Guddiga Shaqaalaha Rayidka,Wasaaradda Shaqada iyo Arrimaha Bulshada, Xiriirrada Ururrada Shaqaalaha, Rugta Ganaciga, UNDP iyo khuburo ku xeel-dheer Arrimaha Shaqada oo Soomaali iyo Ajaanib is ku jiray ayaa maanta Saminaar u soconayey mudo 2 cisho ah loogu soo gab gabeeyey Hoolka shirarka Garoonka Diyaarada Aadan Cadde ee Magaalada Muqdisho.
Siminaarka oo ahaa mid ku salaysan sidii wax looga badali lahaa wax na loogu dari lahaa sharciga Shaqaalaha Dowladda ee L11, Islamarkaana ay ku baranayeen qaabka casriga ah ee ku haboon wax ka badalka sharuucda ayado oo la waafajinayo xeerka dalka u degsan iyo kan caalamka, kaas oo ah nidaam loogu tala galay in lagu horumariyo sharciga shaqaalaha Soomaaliyeed.
Wasiir ku xigeenka Wasaaradda Shaqada iyo Arrimaha Bulshada mudane Cusmaan Libaax Ibraahim oo xiritaankii Siminaarka ka hadlay ayaa uga mahad caliyay dhammaan ka soo qeyb galayaasha, sheegayna in saminaarka uu ahaa mid loogu tala galay in ay Shaqaalaha dowladda kaga gudbaan nidaamka hadda ay u adeegsadaan sharciga Shaqaalaha L11 sidii loo hormarin lahaa.
Wasiir ku xigeenka wasaaradda shaqada iyo arrimaha Bulshada mudane Cusmaan Libaax Ibraahim oo si rasmi ah u soo xiray Saminaarka ayaa ku tilmaamay in uu yahay mid faa’iido u leh Shaqada iyo shaqaalaha Dowladda, ka qayb gelayaasha fursada u helay looga baahan yahay in ay uga faa’ideeyaan Shaqaalaha iyo , xarumaha ay ka yimaadeenna.