28/7/2021 Kusimaha Agaasimaha Guud ee Wasaaradda Waxbarashada, Hiddaha iyo Tacliinta Sare, Mudane Ismaaciil Yuusuf Cusmaan ayaa soo xiray Shirka wadatashiga siyaasadda Qaran ee xirfadaha shaqada iyo farsamada gacanta ee Dowladda Federaalka iyo Dowladaha xubnaha ka ah DFS kaasoo labadii maalmood ee la soo dhaafay ka socday magaalada Muqdisho.
Wasaaradda Shaqada iyo Arrimaha Bulshada ee Xukuumadda Federaalka Soomaaliya iyo Wasaaradda Waxbarashada, Hiddaha iyo Tacliinta Sare ee Xukuumadda Federaalka Soomaaliya, ayaa si wada jir ah gacan uga geystey aasaasidda siyaasadda Qaran ee Xirfadaha, Farsamada gacanta, iyo tababarrada (TVET).
Wasaaradda Shaqada iyo Arrimaha Bulshada ayaa dadaal galisay horumarinta Farsamada iyo xirfadaha gacanta, taaso door weyn ka qaadanaya xal u helida qorshaha qaran ee lagu dhimayo shaqo la’aanta ay wajahayaan Dhallinyarada Soomaaliyeed.
Ugu horeyn waxaa ka hadlay Agaasimaha waaxda waxbarashada dadban ee Wasaaradda waxbarashada Mudane Cabdicasiis Nuur Maxamed
“Manhajka aqoonta iyo tikniyoolajiyada ee iskuulada farsamada dalka waxay raacayaan horumarinta casriga ah ee TVET-ka dhijitaalka ah si loo sameeyo qeybaha kala duwan ee waxbarashada farsamada gacanta “
“Waxaan dadaal badan ku bixinaynaa barashada wax soo saarka dalka si aan u helno warshado yar oo aan ku kaydin karno wax soo saarka dalkeena taas oo aan uga gudbi karno caqabado badan oo aan ka qabanayno TVET.”
“Waxaan soo dhaweyneynaa ganacsatada ka shaqeyneysa horumarinta TVET-ka sida Iskuulka Heila Bariise iyo kuwa kale. Bilaha ka harsan ee 2021, waxaan rajeynaynaa inaan dhameystirno siyaasada iyo manhajka waxbarashada iyo tababarka ee TVET-ka Soomaaliya”.sidaana waxaa yiri Mudane Cabdicasiis Nuur Maxamed Agaasimaha TVET. MoECHE.
Intaas kadib waxaa goobta kahadlay Agaasimaha Tababarka iyo Xirfadaha TVET-ka ee Wasaarada Shaqada iyo Arrimaha Bulshada Maxamed Xasan Maxamed (Xambe)
“Talooyinkiina waxaa lagu dari doonaa siyaasada TVET hana ka shakin in talooyinkaaga iyo dadaalka aad ugu jirto inaad wax ku biiriso siyaasadan”.
“Soomaaliya dhibaato badan ayaa soo gaartay laakiin waxaan rajeyneynaa inaan ku guuleysano horumarinta siyaasada TVET-ka”.
“Soomaaliya waxaa ka maqan maalgelin muhiim ah oo ku saabsan qaab dhismeedka TVET. Siyaasadani waxay awood siineysaa dowladda federaalka iyo dowlad goboleedyada.”
“Waxaan aad ugu rajo weynahay in waqtiga soo socda aan awoodi doono inaad soo laabataan oo aan wadaagno qoraalka Siyaasadan oo af-Soomaali ah taas oo lagu baahin doono dalka oo dhan.” ayuu yiri Maxamed Xasan Maxamed (Xambe) Agaasimaha MOLSA.
Kusimaha Agaasimaha Guud ee Wasaaradda Waxbarashada, Hiddaha iyo Tacliinta Sare, Mudane Ismaaciil Yuusuf Cusmaan oo soo xiray Shirka wadatashiga siyaasadda Qaran ee xirfadaha shaqada iyo farsamada gacanta ee Dowladda Federaalka iyo Dowladaha xubnaha ka ah DFS ayaa u sheegay ka qaybgalayaasha ereyo wax ku ool ah oo ku saabsan siyaasada TVET.
“Waxaan rajeynayaa in shirkan wadatashiga ahaa ee aad waqti badan galiseen in uu noqdo mid mira dhal ah”.
“Wasaaradda waxbarashadu waxay dib u habeyn balaaran ku sameysay dalka, waxayna ku guuleysatay siyaasado dhowr ah sida siyaasada macalimiinta iyo kuwa kale, siyaasadan TVET waa siyaasad dalkeena aad ugu baahan yahay”
“Wasaaradda Waxbarshada waxay heshay deeqo waxbarasho oo loogu talagalay waxbarashada TVET laakiin dadkeenu waxba kama faa’iideysanayaan oo wey diidayaan TVET. Sannad kasta Suudaan waxay bixisaa deeqo waxbarasho oo ay ku jiraan TVET nasiib daro ardayda TVET ma doonayaan.”
“Waxaan jecelahay inaan u mahadceliyo cid kasta oo gacan ka gaysatay dejinta siyaasaddan, waxaan idinka codsanayaa inaad u sharaxdaan madaxda gobollada aad ka soo jeedaan TVET-ka”.
Wadahadalka maanta la soo gabagabeeyay waxaa loogu talagalay in lagu qaabeeyo laguna barto horumarka mustaqbalka ee TVET Soomaaliya.
Shirka ayaa ku soo dhamaaday jawi aad u wanaagsan iyadoo laga faa’iideystay aqoonta TVET ee Soomaaliya.
