Oktoobar 19, 2019 (ENTEBBE, Uganda): Urur-gobaleedka (IGAD) ayaa soo gabagabeeyay Wada-hadallada ku saabsan Borotokoolka dhaqdhaqaaqa xorta ah ee dadka. Wafdiga ka socday dalka Soomaaliya waxaa hogaaminayay Agaasimaha Guud ee Wasaaradda Shaqada Arrimaha Bulshada Mr. Maxamed Cadde Mukhtar oo uu wehliyay Lataliyaha Wasaaradda Shaqada Arrimaha Bulshada Mudane Prof. Yuusuf Salaad Warsame waxeyna ka qeyb qaateen hadalada masuuliyiinta sare ee dalalka IGAD.
Shirka oo soconayay sedex maalmood ayaa doodo ballaaran laga yeeshay faa’iidooyinka dhaqdhaqaaqa xorta ah ee dadka gobolka IGAD, wufuudduna waxey la yimaadeen dukumenti la safeeyey oo ay aqbali karaan dhammaan dhinacyada soo xaadirtay Shirka.
“Inta lagu gudajiray sedexda maalmood ee wada-xaajoodka, waxaan si guul leh u soo gabagabeynay wada-xaajoodkeenii sidii loo qorsheeyay wareegii labaad oo hadda waxaan dib u xaqiijinay nidaamka Dhaqdhaqaaqa Xorta ah ee Dadka Gobolka IGAD”, ayuu yiri Maxamed Cadde Mukhtar Agaasimaha Guud ee Wasaaradda Shaqada Arrimaha Bulshada.
Shirka ku saabsan Borotokoolka dhaqdhaqaaqa xorta ah ee dadka Urur-gobaleedka (IGAD) waxaa muhiim u ah in la helo istiraatiijiyad wacyigelin oo joogto ah, si ay dad badan oo dadkeena ah ugu qancaan dhaqdhaqaaqa xorta ah. Waxaana la Shaaciyay in wareegga xiga ee wadaxaajoodkan uu ka dhici doono bisha soo socota November 2019 Dalka Sudan ee Caasimadda Khartoum.